Бугарската десничарска партија „Преродба“ ќе поднесе предлог-закон за изменување и дополнување на Законот за државен печат и национално знаме на Република Бугарија, јавува партискиот прес-центар.

Во причините за предлог-законот се наведува дека Законот за државен печат и национално знаме на Република Бугарија не предвидува забрана за подигање и поставување до него знамиња и симболи на меѓународни организации чиј член е земјата – ЕУ и НАТО.

Партијата инсистира зборот „само“ да се стави пред „националното знаме“ и законскиот текст да ја добие следната смисла: „Само националното знаме на Република Бугарија да се подигне на бугарските дипломатско-конзуларни претставништва и да биде ставено на возилата на бугарските дипломатско-конзуларни претставници под услови утврдени со меѓународни договори и обичаи“, се вели во партискиот став.

Според „Преродба“, бугарското државно знаме е сведено на дел од комбинација од три различни знамиња.

„Поставувањето на нашето државно знаме на рамноправна основа со знамињата на меѓудржавните организации НАТО и ЕУ не само што претставува кршење на Законот за државен печат и државното знаме на Република Бугарија со заобиколување на значењето на неговиот дух со подзаконски нормативен акт. Тоа претставува национално понижување и удар врз суверенитетот на Бугарија, кој трае веќе 20 години“, категорично соопштија од партијата.

„Преродба“ се повикува на Законот за американско знаме, кој забранува веење на кое било друго знаме освен американското знаме што автоматски го забрани поставувањето и на ЛГБТИ+ знамиња на фасадите на американските дипломатски и конзуларни претставништва на САД во светот што Бајден го дозволи по повод одредени празници врзани за овие заедници во САД.