Премиерот на сојузната држава Викторија, Даниел Ендрјуз, останува на својот став дека Новак Ѓоковиќ, не требаше да добие медицинско изземање и да влезе во земјата за да се натпреварува на Австралија Опен.

Иако Ѓоковиќ по пет дена поминати во хотел за мигранти во Мелбурн, го доби случајот на федералниот суд и му беше вратена визата, не значи дека српскиот тенисер ќе настапи на Австралија Опен. Австралиските власти денеска започнаа нова истрага против Ѓоковиќ бидејќи дал лажни податоци при поднесување на барањето за виза.

Премиерот на Викторија каде се наоѓа Мелбурн и понатаму го брани својот став дека Ѓоковиќ не требаше воопшто да добие медицинско изземање за влез во Австралија.

– Останувам на тоа што го зборував во минатото. Кога ме прашаа дали би барале од федералната влада да направи исклучок за одредени лица и да им одобри да влезат во Австралија без вакцина, мојот одговор беше не, и сега останува истиот. Кој ќе влезе во земјата и правилата за влез не се наша работа туку на федералната влада. Што се однесува до процесот околу добивање виза, со тоа се занимаваше Тениската федерација на Австралија. За да може да влезе во земјата без каранитн, сојузната влада мораше да го спонзорира Ѓоковиќ, ние тоа не го направивме, но исто така ние не сме тие што одлучуваат за визите – изјави Ендрјуз.  

Со иста документација за медицинско изземање виза добија уште неколку тенисери, но власите се кренаа на нозе кога станува збор за Новак Ѓоковиќ и многумина сметаат дека српскиот тенисер им послужи како играчка на политичарите да добијат поени кај своите граѓани пред изборите.

– Станува збор за активен процес,требаше да видиме дали ќе има жалби и не сакам да коментирам. Никого не се обидовме да убедиме дека некој треба да се пушти во земјата, напротив. Во изминатите недели и месеци зборувавме за медицински изземања и дека претходна инфекција со ковид-19 не може да биде основа за барање на такво изземање. Но, ситуацијата се смени и многу луѓе се пуштени во земјата со таков документ. Овој турнир е многу поголем од било која личност. Станува збор за гран слем, најголемиот тениски настан во првиот квартал секоја година. Како таков е поголем од било која личност, без разлика дали таа личност е на теренот или надвор од него – додаде Ендрјуз.