Прекумерниот туризам го „удави“ Санторини. Според градоначалникот, од 2025 година приоритет ќе имаат бродовите за крстарење кои ќе имаат квалитетни карактеристики како ниско ниво на јаглерод диоксид и други загадувачи, ќе бидат со помали димензии и ќе се задржуваат подолго време на островот, најавува То Вима.

– Имав среќа што се родив и израснав на два прекрасни острови на Кикладите. Така, со болка ја доживеав трансформацијата на Санторини од остров со мирна идилична атмосфера во опсаден од десетици илјади туристички „напаѓачи“, чија потреба за прием предизвика градежен бум во хотелите, конаците и областите за угостителство и рекреација до таа мера што повеќето од неговите лозја беа претворени во парцели. Илјадници туристи го преплавуваат од пролет до есен, а за нивното добредојде и гостопримство беше исполнет со хотели, изнајмување соби, таверни и ноќни клубови. Стотици автобуси и комбиња ги задушуваат тесните и лошо одржувани улици, додека некогашните мирни ноќи ги уништи музичкиот фашизам на доминантната англо-американска музика и постојаната врева дури и во ситните ноќни часови. Мојот некогаш идиличен дом постепено беше опкружен со секакви ресторани и кафулиња, кои го прават спиењето проблематично бидејќи работат во раните часови по полноќ – вели градоначалникот на островот, Николаос Зорзос.

Најголем проблем за него предизвикуваат дневните пристигнувања на најмалку четири или пет „монструозни“ бродови за крстарење, кои истовремено испуштаат повеќе од 8.000 туристи на островот. Во последниве години, додадени се и дневни посетители од Крит и другите острови Киклади, што предизвика дополнителен стрес кај локалната власт. Повеќе од 500 големи автобуси, 4.000 минибуси и комбиња на кои им се додаваат автомобилите на жителите и изнајмените возила од туристите, предизвикуваат сообраќаен ќор-сокак, додека паркирањето исто така стана голем проблем. И сето тоа во амбиент на прекумерна градба и ексцеси во краткотрајните закупи, кои ги лишуваат сезонските работници и јавните службеници од домување.