Центарот за локални иницијативи од Битола, од 19 до 23 јуни го реализира проектот: „Афирмација на културата и традицијата преку креативни иновативни занаети за млади-КИЗ4М“.

Проектот ги опфаќа старите занаети како дел од традицијата и културата во Битола и Битолско, кои за жал, полека но сигурно изумираат.

-Изумирањето на старите занаети воедно претставува губење на значаен дел од културното наследство. Според нашите истражувања, последниве години забележан е благ тренд за реанимација на дел од старите занаети од помлади луѓе. Иако тој тренд е многу мал сепак претставува надеж дека нешто може и да се спаси доколку се преземат вистински чекори, а со тоа би се придонело за спасување на традицијата и културното наследство-вели Мимоза Богданоска Јовановска, претседателка на Центарот за локални иницијативи во Битола.

Во рамки на проектот, учесниците ќе извршат анимирање и едукација на млади креативни луѓе во три различни занаети, со цел стекнување на основни знаења и вештини за работа во тој занает со крајна цел занаетот да стане нивна идна професија.

-Првата активност е во тек, летна школа со работилници посветени на изучување на три стари занаети, односно изработка на производи од сребро, глина и текстил со мотиви од културното наследство во кои ќе се прави спој на уметност, мотиви од фолклорот и културата и нови материјали. Втората активност е креирање на дигитална платформа за промоција на конкретните занаети, но и слики и рецепти од традиционални јадења – подготовка на храна по стари рецепти кои исто така се дел од културното наследство на учесниците.

Ментори на летната школа се афирмирани претприемачки од Битола: Биљана Велчевска – Ателје „Израз“, Надица Бицева-Димитровски – Ателје „Креација“ и Лили Кадинска – Модно студио „Ле Бранд“. Овие млади уметнички кои својот бизнис го засноваат на стар занает својата креативност ја вградуваат во занаетот правејќи комбинација на нивниот креативен израз врз основа на мотиви од богатото културно наследство, при тоа добивајќи атрактивни производи барани и пласирани во земјата и странство, вели Мимоза Богданоска Јовановска менаџер на проектот „Афирмација на културата и традицијата преку креативни иновативни занаети за млади“.

Инаку, проектот се реализира со поддршка на Министерството за култура.