Стотици славни личности од Холивуд потпишаа отворено писмо, во кое ги осудуваат „варварските дејствија“ на борците на Хамас, кои убија и киднапираа стотици израелски цивили во последните неколку дена.

Израелската актерка Гал Гадот, која доживеа светска слава со улогата во акциониот филм „Wonder Woman“, е меѓу ѕвездите на листата, на која се и Џејми Ли Кертис, Крис Пајн, Мајим Биалик, Лиев Шрајбер, Мајкл Даглас и Џери Сајнфелд.

„Хамас убиваше и киднапираше невини мажи, жени и деца. Тие киднапираа и убиваа новороденчиња и старци. Тоа е тероризам. Тоа е зло. Нема оправдувања, ниту рационализација за постапките на Хамас. Тоа се варварски и терористички дела, кој сите мораат да ги осудат“, стои на почетокот од отвореното писмо, кое го објави „Creative Community For Peace“.

„Тие се терористичка организација, чии водачи повикуваат на убивање Евреи насекаде. ‘Creative Community For Peace’ ги повикува нашите пријатели и колеги во забавната индустрија да зборуваат силно против Хамас и да направат сѐ што е во нивна моќ за да ја охрабрат терористичката организација да ги врати невините заложници на нивните семејства.“

Додека Израел ги презема неопходните чекори за да ги одбрани своите граѓани во наредните денови и недели, социјалните мрежи ќе бидат преплавени со оркестрирана кампања за дезинформации предводена од Иран“.

Ги повикуваме сите да се сетат на ужасните слики што доаѓаат од Израел и да не наседнуваат на нивната пропаганда. Нашите мисли се со сите за оние кои, во моментов, живеат во страв и доживуваат насилство и се надеваме дека ќе дојде денот кога Израелците и Палестинците ќе можат да живеат заедно во мир“, заклучуваат ѕвездите во отвореното писмо.

Писмото, потпишано од повеќе од 700 луѓе од светот на забавата, доаѓа откако вооружени лица на Хамас убија 1.200 луѓе во Израел и зедоа околу 150 заложници во ненадеен напад од Газа. Израел возврати со шестдневни воздушни и артилериски напади врз цели на Хамас во Газа, кои однесоа повеќе од 1.400 животи.