Според Глобалниот барометар за 2025 година, кој беше објавен пред претстојниот собир на претставниците на светската деловна и политичка елита во елитниот зимски камп, светот е на критичен крстопат меѓу светските поредоци соочени со бројни предизвици, а соработката е единствениот пат напред, објави Политика.рс.

„Може да се каже дека тридецениската зголемена соработка што ја видовме по Студената војна дефинитивно заврши. Имавме еден светски поредок по Студената војна кој ја подобри и охрабри соработката. А сега навистина не знам што е новиот светски поредок“, рече претседателот на Светскиот економски форум Берге Бренда.

Тој предупреди дека тековното распаѓање во глобалната соработка и трговија може да доведе до пад на глобалниот БДП за седум до осум проценти. Според него, годинава се очекува економски раст од околу 3,1 отсто, како и раст на трговската размена за повеќе од три отсто, што и во двата случаи е значително побавен раст од минатото.

„Можеби нема поголеми случувања во мултилатералните договори, но пред празниците видовме дека Меркосур и ЕУ се собраа и се договорија за трговски договор“, истакна Бренде.

Светскиот економски форум посочува дека пазарот на труд значително ќе се промени во иднина.

„Технолошките промени, геоекономската фрагментација, економската несигурност, демографските промени и зелената транзиција – поединечно и во комбинација – се меѓу главните двигатели што се очекува да го обликуваат и трансформираат глобалниот пазар на труд до 2030 година“, се истакнува во извештајот.

Како што се наведува, стареењето на населението во поразвиениот дел на светот ќе ја зголеми потребата од здравствени работници, додека на земјите во развој ќе им требаат уште повеќе наставници, професори во средните училишта и универзитетски професори.