Непознат подносител во 2025 година во Државната комисија за спречување корупција пријавил дека „друштво за услуги профитира и наплаќа камати на клиентите“. Во пријавата до Антикорупциска пишува дека подносителот позајмил пари со договор дека ќе ги враќа на месечни рати. Но, потоа непознати лица му вршеле притисок да плаќа во готово со закани дека во спротивно ќе го дадат на извршител.

-За овој случај ДКСК нема надлежност за постапување. Надлежни се други органи и затоа оваа пријава ќе биде доставена до МВР и до Јавното обвинителство, реферираше членот на Антикорупциска Зоран Богоевски.

На денешната седница констатирано беше дека повеќе екс-пратеници во Собранието на Македонија на кои им престанал мандатот, не доставиле изјава за имотната состојба по завршувањето на мандатот поради што им биле пишувани казнени налози. Дел од екс-пратениците си ги плаќале глобите, но друг дел не ги плаќале поради што им се отворени прекршочни постапки.

Меѓу отфрлените пријави до Антикорупциска беше и таа дека некое правно лице „незаконски издавало автокампови“ и имало „дивоизградени сместувачки објекти на земјиште што е во постапка на денационализација“. Правното лице според државниот пазарен инспекторат вршело угостителска дејност, а од Обвинителството ја информирале Антикорупциска дека постапуваат за овој предмет уште од 2022 година и моментално истиот бил во фаза на вештачење под наредба на Вишото јавно обвинителство.

Управата за финансиска полиција доби препратен предмет од Антикорупциска денеска кој се однесува за службени лица со наводи за постоење судир на интереси, злоупотреба на службена положба и овластување и неосновани исплати на пари прикажани како донација, како и пракса за вршење набавки без тендери.

Членот на Антикорупциска Бесник Џемаили реферираше предмет од 2024 година доставен до Антикорупциска од познат подносител со сомнежи за незаконски повик за јавна набавка.

Во пријавата се наведувало дека во ЈЗУ Психијатриска болница (не беше откриен градот каде се наоѓа болницата) била спроведена јавна набавка со услови во тендерската документација што биле ограничувачки и наменети само една фирма да може да ги исполни. За овој тендер информирани биле и Комисијата за заштита на конкуренцијата и Бирото за јавни набавки. Антикорупциска ја отфрли и оваа пријава зашто Бирото за јавни набавки ги информирало дека државната комисија за жалби веќе го поништила тендерот. Затоа предметот беше затворен и архивиран едногласно од сите членови на ДКСК.