Дел од вториот ден од општата расправа за Предлог-буџетот за 2025 година во собраниската Комисија за финансирање и буџет, помина во размена на реплики и контрареплики меѓу Фатмир Битиќи, пратеник од СДСМ и Николче Јанкулоски, заменик министер за финансии. Битиќи, го критикуваше фискалниот модел на Владата, нарекувајќи ја „казнувач и собирач на приходи“.

– Ова што го имаме пред нас не се само бројки, туку реалност, која ќе ги погоди сите граѓани, бидејќи Предлог-буџетот е само рецепт за нови долгови, а наша должност како опозиција е да ги браниме интересите на граѓаните. Ова што е пред нас, не е Буџет, туку само отворен чек кој ќе остави пустош – посочи Битиќи, кој ја искористи говорницата да се извини за вчерашниот испад во Комисијата.

– Тоа однесување не доликува на демократското однесување, не доликува на „Домот на демократијата“. Тоа беше само реакција на нападите кои како опозициски пратеници константно ги добиваме за нè замолчат да го кажеме она што мислиме. Затоа ќе ви порачам – вие сте 58, а јас сум само 1 и можете само да ми го одземете животот и ништо друго – порача Битиќи.

На тоа му реплицираше заменик министерот за финансии, кој оцени дека има многу чудна ситуација кога довчерашен вицепремиер сега се чуди зошто Владата планирала раст од 3,7 отсто за 2025, а претходната власт едвај надмина 1,8 отсто.

– Растот го планираме врз основа на факти и сериозни макроекономски проекти, оваа власт покажа како треба да се работи. Во периодот октомври 2023 – октомври 2024, зголемена е наплатата на данок од доход, на ДДВ, а не сме вовеле нови даноци, туку само ефикасна работа на инситициите. Увозните давачки се зголемени за 12,8 отсто, а придонесите за ПИОМ 11,4 отсто. Ќе ја намалиме даночната евазија во државата, ќе ја спречиме со е-фактура, возврати Јанкуловски.

Пратеникот Битиќи, контрареплицираше дека ако немало вработени, тогаш ВМРО-ДПМНЕ немало да може да фали дека собира повеќе данок на личен доход.

– Со мерките на претходната Влада беа спасени 80.000 работници и 24.000 компании, па затоа вие денес можете да кажете дека имате повеќе даночни приходи – рече Битиќи.

Јанкуловски на тоа возврати дека во Буџетот за 2025 година се предвидени повеќе пари за привлекување на странски инвестиции, но и за инвестиции на домашните компании.

Стојановска до СДСМ: Поднесете амандман за зголемување на затворските капацитети, ќе ви требаат

Овој буџет е првиот сончев зрак за Македонија, порача од собраниската говорница пратеничката од ВМРО-ДПМНЕ, Дафина Стојановска. Критикувајќи ги поднесените 204 амандмани на Буџетот од СДСМ, таа ја искористи можноста и ги советуваше да поднесат амандман со кој ќе побараат зголемување на затворските капацитети во Македонија, за нивната како што рече „втора иднина“.

– Амандманите од СДСМ, на кои се потпишани претходни министри и вицепремиер, зборува за безидејноста и крајот на тунелот на играорците на кои им свиреа труби. Трагично е што бившите извршни моќници денес изигруваат општински советници и поднесуваат амандмани за локални патчиња, а новата власт издвои 100 милиони евра за локална инфраструктура и плус 250 милиони евра само за локални проекти. Очекувано беше вакво однесување на оние кои седум години не помрднаа ниедно камче, а денес покажуваат лажна грижа за проекти кои тие можеле да ги направат. 204 амандмани се сè, само не вистинска грижа за граѓаните – додаде Стојановска.

Таа го прозва и лидерот на СДСМ, Венко Филипче за неговиот говор, за кој рече дека „мамурно го исчитал и избегал од говорницата, без да спомене ниту еден збор за здравството, бидејќи од него направил личен бизнис“.

– Филипче е најнеобразуваниот лидер кој некогаш го имал СДСМ, а Собранието не е журка во Дубаи, ниту хациенда на Халкидики – додаде Стојановска, порачувајќи дека ќе се прочешла секој нивни тендер и бизнисите и „тоа не е закана, туку барање на 600.000 граѓани кои ја испратиле СДСМ во историјата“.