Европската Унија (ЕУ) би можела наскоро да потпише договор за набавка на анти-ковид вакцини со „Новавакс“, изјавија двајца официјални претставници на ЕУ кои биле вклучени во разговорите со американската компанија. ЕУ во декември во 2020 година ги заврши прелиминарните преговори со „Новавакс“ за испорака на 100 милиони дози и разговараше за дополнителни 100 милиони вакцини.

– Разговорите со „Новавакс“ се интензивирани и наша цел е да склучиме договор во оваа или во текот на наредната недела, истакна еден од претставниците.

Вториот претставник на ЕУ, кој присуствувал на преговорите, го потврди временскиот рок на договорот, додавајќи дека разговорите со адвокатите на компанијата сè уште се во тек, одбивајќи да каже уште кои прашања треба да се договорат.

Вакцината на „Новавакс“ е во фаза на тестирање, но прелиминарните податоци покажуваат дека е ефикасна во 89,3 проценти во борбата со ковид-19 при испитувањето извршено во Британија и речиси е подеднакво ефикасна во заштита од позаразната мутација на вирусот откриен во земјата.

Евентуалниот договор со „Новавакс“ ќе биде седми што ЕУ ќе го склучи со производители на вакцини против ковид-19. ЕУ веќе има постигнато договори со „АстраЗенека“, со „Џонсон&Џонсон“, со „Фајзер“ и „БајонТек“, со „КјурВак“, со „Модерна“ и со „Санофи-ГСК“ за вкупно околу 2,3 милијарди дози.