„Њујорк тајмс“ ја тужи „Вејфарер студиос“ – продуцентската куќа на Џастин Балдони – за трошоци поврзани со неговата отфрлена тужба за клевета против публикацијата, пренесуваат странските медиуми.

Во тужбата, поднесена во вторник во Врховниот суд на Њујорк, „Њујорк тајмс“ вели дека бара најмалку 150.000 долари за трошоци, хонорари и издатоци и се повикува на државниот закон против SLAPP (стратешко анти-јавно учество). Во документот се тврди дека страната на Балдони го злоупотребила правниот систем за „малтретирање, заплашување и спречување на слободата на говорот“.

Тужбата доаѓа откако федералниот судија Луис Џ. Лиман во јуни оваа година ја отфрли контратужбата на Балдони од 400 милиони долари, во која, покрај „Њујорк тајмс“, тој ги тужеше и актерката Блејк Лајвли, нејзиниот сопруг Рајан Рејнолдс и нивниот публицист Лесли Слоун.

Судијата заклучи дека страната на Балдони не обезбедила доволна основа за тврдењата за клевета, забележувајќи дека тие не покажале дека Рејнолдс, Слоун или „Тајмс“ знаеле дека спорните изјави може да бидат неточни.

„Њујорк тајмс“ продолжува да стои зад своето известување за случајот што започна со тужбата на Лајвли во декември 2024 година. Потоа таа го обвини Балдони за сексуално вознемирување и одмазда за време на снимањето на филмот „Завршува со нас“.

Портпаролот на „Тајмс“ претходно изјави дека известувањето било „прецизно и одговорно“, додека во најновата тужба се тврди дека Балдони и неговата продуцентска куќа „ја започнале и ја продолжиле тужбата без суштинска фактичка и правна основа“.

Од друга страна, адвокатот на Балдони, Брајан Фридман, во соопштението вели дека нема да се потчини на „влијателни посредници“ и истакнува дека тие се посветени на „потрагата по вистината, соочувајќи се со гигантите“.

Фридман, исто така, ги критикува постојните закони кои, според него, ги штитат традиционалните медиуми, сугерирајќи дека е време да се променат.

Порано оваа година, Фридман ја обвини Блејк Лајвли дека се обидува да избегне одговорност, нарекувајќи го нејзиното барање за отфрлање на контратужбата „злоупотреба на правниот систем“. Лајвли оттогаш се откажа од две одделни тужби против Балдони, во она што нејзиниот правен тим го опиша како „рутинска правна стратегија“.

Судењето помеѓу Балдони и Лајвли, за време на кое се очекува двајцата да сведочат, е закажано за март 2026 година.