Пратениците не ја изгласаа потребата за носење на Законот за амнестија предложен од Министерството за правда. Против законот гласаа 66 пратеници, меѓу кои и пратениците од владејачката СДСМ.

За законот се изјаснија 15 пратеници, додека воздржани беа тројца. Претседателот на собранието Талат Џафери констатира дека Предлог законот за амнестија на Владата не е донесен. Од опозициската ВМРО- ДПМНЕ коментираа дека паѓа Владата и дека пукнала владината коалиција. Тие довикуваа дека министерот за правда Кренар Лога треба да си поднесе оставка. На излегување од Пленарната сала министерот Лога им возврати дека ќе го гледаат до 2028 година.

Претходно Лога ја образложи потребата од носење на Закон за амнестија. Главни аргументи според него се пренатрупаноста и нехуманите услови во затворите. Тој наведе дека актуелниот закон кој го предлага е речиси идентичен од тој во 2018 година и дека нема причина зошто да не се донесе.