Собранието во октомври како да е на есенски одмор кога станува збор за пленарните седници, зашто досега е одржана само една, а следната недела е закажана нова пленарка. Ништо не е поразлична ситуацијата и кога станува збор за законите кои месецов, но и претходните, поминаа на собраниска седница, бидејќи речиси 90 отсто се од техничка природа.

Впечаток е дека во очекување на суштински закони од Владата или од мнозинството, агендата на претседателот на Собранието Африм Гаши е насочена кон посети во странство и прием на амбасадори.
Гаши со парламентарна делегација на почетокот на месецов беше во неколкудневна официјална посета на Турција, а неделава е во работна посета на Берлин. Најавената седница на Комисијата за деловнички и мандатно-имунитетни прашања, на која се очекува да се утврди дали Гаши го прекршил Деловникот за седницата за бранителите, сè уште не е закажана зашто се чека претседателот на Собранието да се врати во државата, како и пратениците што се отсутни поради службени патувања.

Освен законите што ѝ беа битни на Владата, како тој за реорганизација на министерствата, измените за Законот за локална самоуправа со кој мандатот на в.д. градоначалниците се продолжи до редовните локални избори и Законот за кредитот од Унгарија, Собранието во изминативе месеци носи само одлуки и куп закони по скратена постапка од техничка природа.

На дневен ред на пленарните седници доминираат закони поднесени од Владата поради усогласување на веќе донесени закони со имињата на новите и на реорганизираните министерства, откако Собранието го донесе Законот за организација и работа на органите на државната управа уште пред да биде формирана Владата. Со измената на Законот, се формираа нови министерства, и тоа Министерство за спорт, Министерство за енергетика, рударство и минерални суровини, Министерство за дигитална трансформација и Министерство за јавна администрација. Некои од министерствата се реорганизираа, како што е случајот со министерствата за економија и труд, за социјална политика, демографија и млади и Министерството за култура и туризам.

Освен усогласувањето на законите со имињата и надлежностите на новите министерства на агенда на пленарните седници врие од донесување одлуки. Така, на последната 16-та собраниска седница, од 22 точки, 10 се предлог-одлуки, а останатите се предлог-закони по скратена постапка. Иста е ситуацијата и со новата 17-та седница, закажана за следната недела. Од предложени 23 точки на дневниот ред, 20 се по скратена постапка, односно за усогласување на законите со имињата и надлежностите на новите министерства.

Најактивни пратениците од новиот собраниски состав биле на почетокот на мандатот, односно во јуни кога одржале седум пленарни седници, меѓу кои и изборот на Владата.

Иако претседателот на Собранието испратил писмо до претседателот на Комисијата за деловнички прашања за спорни ситуации од Деловникот, претседателот на работното тело Миле Лефков се надева дека следната недела ќе ја закаже комисијата откако Гаши и пратениците членови ќе се приберат во земјава. Сепак, ова не гарантира дека Комисијата ќе расправа дали Гаши го прекршил Деловникот со седницата на Комисијата за социјална политика за законот за бранителите, зашто лично претседателот на Собранието го одредува дневниот ред.

Следниот месец, пак, се очекува Собранието според новиот Деловник, првпат да одржи седница за пратенички прашања што ќе е наменета само за прашања од опозициските пратеници до министрите и премиерот. Досега опозициските пратеници немаа посебна собраниска седница на која само тие ќе поставуваат прашања до Владата, туку тоа го правеа на седницата за пратенички прашања на која прашања поставуваа и пратениците од владејачкото мнозинство. Разликата меѓу двете седници е дека пленарката на која прашања ќе поставува само опозицијата ќе трае два часа и ќе присуствуваат само тие, министрите и, евентуално, премиерот, за кои опозицијата претходно ќе најави дека ќе има прашања.