Државниот испитен центар кој го организира полагањето на државната матура ги објави  термините за полагање на испитите, со тоа што поради пандемијата со ковид-19, покрај редовните термини, екстерните испити ќе можат да се полагаат и во дополнителен термин во истата сесија за сите оние кои се спречени да присуствуваат на редовниот.

На 5 јуни учениците ќе полагаат македонски, албански и турски јазик, додека на 11 јуни се полага вториот екстерен испит, односно испитот за вториот екстерен предмет што го одбрале матурантите – англиски, француски, германски, руски јазик или математика.

Екстерните испити, поради вонредните околности во јунскиот испитен рок, ќе се спроведуваат и подоцна, па така полагањето на македонски, албански и турски јазик ќе се одржи на 25 јуни, додека испитите за англиски, француски, германски, руски јазик и математика ќе се реализираат на 28 јуни со почеток од 10 часот.

Интерните испити како естетика, филозофија, хемија, физика, биологија, историја, социологија, бизнис, информатика или географија ги планира и ги организира училиштето и тие ги одредуваат роковите за полагање.

Лидерот на средношколскиот Сојуз пак, Бленди Ходаи, за „Слободен печат“ вели дека матурантите веќе се подготвуваат за испитите.

– Досега нема некоја жалба од страна на матурантите за одреден проблем со подготовките на матурата. Сите прашања се веќе пратени, па така ние како матуранти веќе почнавме со нашите наставници да се подготвуваме – објаснува Ходаи.

Матурантите со писмо до Заев и Царовска: Професори им давале прашања за интерните испити „ради реда“, а ќе ги „дереле“ со други

Претходно матурантите се жалеа на тоа дека во некои средни училишта наставниците не им ги даваат сите прашања, согласно договорот за државна матура за оваа година, но лидерот на Сојузот тврди дека тоа веќе е минато.

– Проблемите во однос на добивањето на прашањата ги имавме пред еден месец со неколку средни училишта, но успеавме да ги решиме – заклучи Ходаи.