Инфлуенсерката Ванеса Конопка почина на 28-годишна возраст, неколку месеци откако ѝ беше дијагностицирано тешко оштетување на црниот дроб и пневмонија, пренесуваат странските медиуми.

Германката која беше позната по објавувањето содржини за патување заедно со нејзиното момче, Фернандо, се разболе на Филипините на 31 декември 2024 година.

Тој се огласи на нивната заедничка страница на Фејсбук за да ја објави веста за нејзината смрт.

„Таа секогаш сакаше да се поврзува со сите вас, а нејзината љубов кон Филипините беше неопислива“, рекол Фернандо за својата покојна девојка.

Тој продолжил директно да ѝ се обраќа, пишувајќи: „Ако некаде го читаш ова, многу ти благодарам што ме научи како да се сакам себеси, без разлика што мислат другите“.

„Таа ми покажа како да се сакам себеси и како да ги следам моите соништа! Ќе те сакам засекогаш и можеби ќе се видиме повторно“, додал Фернандо.

На страницата за прибирање финансиски средства отворена претходно оваа година, Фернандо објасни дека оштетувањето на црниот дроб и пневмонијата на Конопка „ја направија исклучително слаба“. Извесно време во болница, таа не можела да јаде правилно, да оди или лесно да зборува. Нејзиното момче се надеваше дека ќе собере над 227.000 долари за да помогне за медицинска брза помош во Германија.

И покрај нејзината состојба, Конопка се огласи на социјалните мрежи додека беше во болница на филипинскиот остров Боракај, информирајќи ги своите следбеници за, како што го нарече „најтешкото патување во мојот живот“ во натпис споделен на 21 јануари.