Владата на 13 август обезбеди 52 милиони денари, или 840 илјади евра, за гаснење на пожарите кои летово ја зафатија државата. Најголем дел од парите, или околу 660 илјади евра ќе легнат на сметка на Дирекцијата за заштита и спасување за исплата на дневници за припадниците на доброволни друштва,додека пак остатокот од парите е наменет за сместување, храна и транспорт на вработените при престој во близина на опожарените места, како и за сместување на странските пожарникари кои беа на помош.

Во оваа финасиска инекција од Владата се предвидени пари за исплата на дневници на доброволните друштва кои беа ангажирани во гаснење на пожарите, но не и дополнителни пари за пожарникарите.

Пожарникарите кои секојдневно се бореа со огнената стихија и не можеа да „земат воздух“ од големиот број на пожари кои ја зафатија државава останаа со „празни раце“ откако Владата не предвиде пари за нивна награда. Пожарникарите ќе чекаат на добрата воља на општините, доколку на седница на локалните совети се изгласаат пари како награда за нивниот безрезервен ангажман, за да бидат наградени, или пак на некоја наредна владина седница да се донесе одлука за нивна награда. Засега пожарнинкарите ќе „живеат“ со парите од платата и од изработените дополнителни часови работа кои ова лето ги имаа многу.

Во Македонија која е претендент за влез во Европска унија, има околу 950 пожарникари, или околу 650 помалку за задоволување на потребите. Според достапните информации, во земјите членки на ЕУ, Хрватска има околу 7.900 професионални пожарникари, Шведска околу 7.000, Бугарија 6.500, Финска 3.400 додека пак во Словенија има 1.200 проофесионални пожарникари.

Летово над 1000 пожари ја зафатија републиката, а во нивното гаснење не беа доволни само противпожарните бригади, па мораше да бидат вклучени и припадници на Армијата, екипи на Дирекција за заштита и спасување и Центар за управување со кризи, странски екипи кои беа ангажирани преку механизмот на Европската Унија (ЕУ) во справување со пожари но и доброволни противпожарни друштва кои се приклучија во акциите за справување со огнените стихии.

Од државните пари кои ќе се влејат на сметка на ДЗС, ќе бидат исплатени три доброволни друштва кои беа ангажирани за гаснење на пожарите низ цела република. Иако на терен беа повеќе доброволни противпожарни друштва, сепак само три ќе добијат пари бидејќи само толку имаат потпишано меморандум за соработка со ДЗС. Нивниот ангажман е предвиден да се плаќа на дневна основа но не е познато колку нивните услуги чинат.

Во изминатите пет години над 55 милиони евра изнесува штетата предизвикана од пожарите, додека само летово е предизвикана штета од околу 1,5 милијарди денари само на шумскиот фонд а допрва ќе се прават детални пресметки и анализа за август. Од 2019 година до сега изгорени се над 600 илјади метри кубни квалитетна дрвена маса, што значи дека за пет години изгорело дрво со кое би се грееле една сезона просечно 100.000 четиричлени семејства.