Вчера попладне, околу 17 часот, избувна голем пожар во објекти што служат како магацини на ЈПКД „Комуналец“ во Струмица. На терен интервенирале четири противпожарни возила и 15 пожарникари, соопштија од Територијалната противпожарна единица Струмица.

Според информациите, пожарот бил во разгорена фаза и претставувал сериозна опасност. Поради ризик по животите на пожарникарите, кои биле длабоко навлезени во магацинските простории за да го совладаат огнот, било побарано од ЕВН да се исклучи електричната енергија.

Во меѓувреме, друг тим на пожарникари, и покрај обилниот дожд, успеал да го отвори лимениот покрив за чадот да може да излезе од внатрешноста на објектот.

Пожарот е целосно локализиран и изгаснат, но предизвикал голема материјална штета. Екипа на ТППЕ Струмица останала на местото и синоќа заради дежурство и контрола.