Во шумски пожар на француското крајбрежје, кој сѐ уште е вон контрола, едно лице загина, а 27 се повредени или вдишале чад, соопштија локалните власти.

Францускиот весник Вар-Матин ја идентификуваше жртвата како маж што бил пронајден мртов во својот дом во градот Гримо.

Меѓу 27-те повредени има и пет пожарникари, соопшти префектурата Вар.

Од своите домови и камповите се евакуирани над 7.000 луѓе кои се сместени во привремени засолништа.

Пожарот запоќна во понеделникот, а го гаснат над 1.000 пожарникари помогнати од хеликоптери.

Францускиот претседател Емануел Макрон кој летниот одмор го поминува во место во близината, вчера ја посети зоната опфатена со пожари.

Поради високите температури, со пожари се зафатени големи делови од Медитеранот, а некои места во Грција, Турција, Италија, Алжир и Шпанија се уништени до темел.