Косовската вицепремиерка, воедно и министерка за инфраструктура и енергетика, Белинда Балуку денеска соопшти дека е повторно отворен меѓународниот повик за изградба на новото пристаниште Порто Романо кај Драч.

Изградбата на пристаништето Порто Романо, според неа, е стратешка инвестиција за Албанија и регионот.

Рокот за доставување на понудите е 7 февруари наредната година, додека се предвидува завршувањето на првата фаза од работите да трае 40 месеци.

Вицепремиерката Балуку ги покани домашните и странските економски оператори да учествуваат на овој меѓународен тендер.

Повикувајќи се на податоците објавени во Агенцијата за јавни набавки, проценетиот лимит на фондот е 39,3 милијарди леки.

Првично конкурсот беше отворен кон крајот на јули годинава. Тендерскиот процес за новото пристаниште во Порто Романо го водеше холандската компанија Ројал Хасконинг, но поради несоодветни понуди тендерот беше откажан.

Порто Романо се смета за една од најважните пристанишни инвестиции во Албанија, бидејќи ова пристаниште не само што ќе ја опслужува земјата, туку ќе ги опслужува и Косово и Северна Македонија, поврзани железнички со две копнени пристаништа, соодветно во Приштина и Скопје.