Потребите за вода во земјоделството се големи. Намалувањето на температурите и повремените врнежи не ја сменија состојбата, поради што наводнувањето останува приоритет, велат агрометеоролозите од УХМР.

Како што истакнуваат, во овој период треба да се посвети поголемо внимание на заштита од појава на пламеница кај виновата лоза и да продолжи примената на сите агротехнички мерки кај посевите.

– Изминатава недела имавме сончево и топло време со повремени врнежи на дожд на некои места. Овие количини врнежи од дожд не ја подобрија состојбата со влага во почвата, која е потребна за посевите во овој период од годината. Намалувањето на температурите за неколку степени не ја смени состојбата на долготрајната суша во земјоделството. Овие временски услови се непогодни за сите култури, освен за некои видови овошки што се наоѓаат во фаза на берба и зреење на плодовите – велат агрометеоролозите.

Потребите за вода се големи, посебно за пролетните и окопните култури, особено за пченката и за сончогледот кој се наоѓа во фаза на исполнување на зрното.

– Затоа, приоритет на земјоделските производители треба да биде снабдување на земјоделските култури со потребното количество вода, да се посвети поголемо внимание на заштита од појава на пламеница кај виновата лоза и кај сите останати посеви да се продолжи со грижа и примена на сите потребни агротехнички мерки – советуваат агрометеоролозите.