Густ чад утринава го покри дел од Тетово откако силен пожар избувна во објект каде се произведува, но и продава мебел.

На деловниот објект тетовските пожарникари интервенирале повеќе од 4 часа со 10 возила и десетина пожарникари, успевајќи да го спасат горниот кат на објектот, долниот е целосно пеплосан.

При интервенцијата со повреди се здобиле четворица пожарникари. Противпожарен тим од Тетово се уште дежура на лица место оти температурата на објектот е висока и постои опасност повторно да избувнат пламени јазици.

„Денеска околу 6 часот наутро имавме најава дека има пожар во објект долж патот кој води кон скијачкиот центар Попова Шапка каде се произведува и продава мебел. Интервениравме и успеавме со нашата интервенција да не се прошири пожарот на горниот кат од објектот. Беше силен оган и претопло беше, имаме четворица пожарникари за среќа со лесни повреди, тројца се здобија со повреди на главата и нозете, а еден вдиши поголемо количество чад и мораше да интервенираат медицински лица. Има голема топлина во објектот и треба да се внимава оти во самиот објект се уште има мебел кој е лесно запаллив и затоа се уште таму дежураат пожарникари“, рече Авни Амети командир на ТППЕ Тетово.

Инаку веќе шести ден е активен пожарот на дивата депонија во атарот на село Добарце, Општина Желино.

„Во Добарце во Општина Желино како пожарникари често интервенираме на запалената депонија. Таму депонија се уште гори. Треба таа депонија да се ископа и да се затрупа со земја, ако сакаме да се ликвидира пожарот, интервенцијата со вода не дава големи резултати“, рече командирот Амети.

Денеска тетовските пожарникари интервенираа и на уште две локации кај тетовските села Челопек и Теарце. Таму гореа стрништа.

„Им апелираме на граѓаните да бидат внимателни, да не палат оган и фрлаат отпушоци од цигари и слично на отворен простор, зошто пожарите на отворено од овие причини најчесто избувнуваат. Оваа споредбено со ланската година имаме над 100 пожари повеќе, дополни командирот Амети.

Пет дена гори депонија во Општина Желино, попладнево интервенираа противпожарни авиони