Стравот од рестрикции на струја, високите цени на струјата и драстично зголемената цена на пелетите, повторно дел од скопјани ги вратија на традиционалното греење на дрва, иако и овој начин на загревање на домот годинава е значително поскап споредбено со минатата грејна сезона. Како доказ за тоа е зголемената побарувачка на оџачарските услуги во градот до таа мера што, како што објаснуваат оџачарите – тешко се постигнува.

Според Ѓуро Поповиќ, оџачар со над 30 – годишно работно искуство, побарувачката за нивната работа на терен во изминатиот период е зголемена за дури триесет отсто и тоа најмногу во деловите на Скопската Котлина што немаат централно парно греење. Бројот на оџаци што ќе чадат оваа грејна сезона во Скопје воопшто не е за потценување бидејќи според неофицијални податоци станува збор за околу 60. 000. За жал, дел од нив, поради тоа што на сопствениците чистењето им изгледа скапо или поради недоволна информираност, ќе останат неисчистени, дополнително загадувајќи го воздухот во градот, кој со години наназад високо котира на списокот на најзагадени градови во светот.

Граѓаните се со поделени мислења околу најисплатливиот начин на загревање на домовите во претстојната грејна сезона. Додека за едните греењето со инвертери нуди најекономично и најбезбедно загревање на домот, други пак се плашат дека може да дојде до рестрикции на електрична енергија или пак до драстично зголемување на сметките за струја, па покрај овој начин на греење што досега го сметаат за најсоодветен, се обидуваат да си обезбедат уште една „резерва“ варијанта на загревање на домот. За оние граѓани, пак, кои со години наназад се греат на пелети, годинава оваа варијанта на загревање на домот е најскапа бидејќи цената на една вреќа пелети достигна вртоглава цена од повеќе од 400 денари, што на дневно ниво едно семејство за да го затопли домот би го чинело околу 1200 денари, па и тие греењето на дрва повторно го сметаат за поисплатлива опција.

Токму поради тоа, огревното дрво повторно на голема врата се враќа како еден од начините на загревање на домот.

– Во моментов дома се грееме на инвертер иако имаме поставено и печка на пелети. Сепак годинава нема да купуваме пелети поради фактот што на пазарот постојано нивната цена расте. Поради страв од сметките за струја, годинава за првпат купивме и неколку кубика дрва со кои планираме да го загреваме домот со стариот шпорет кој „го исфрливме“ од употреба пред неколку години, доколку, се разбира, ваквиот начин на греење повторно ни се види најсоодветен – раскажува жителка на Лисиче.

И оџачарот Поповиќ потврдува дека дел од граѓаните се одлучуваат да ги исчистат оџаците за да бидат подготвени доколку во наредниот период овој начин на затоплување на домот им е најисплатлив, притоа напоменувајќи дека чистењето оџаци е исклучително потребно и кога станува збор за греење на дрва, но и за греење на пелети.

– Побарувачката во последно време за да се чистат оџаците е зголемена. Дел од граѓаните бараат да им се исчисти оџакот бидејќи оваа грејна сезона ќе се греат на дрва, но дел од граѓаните сакаат да се исчистат оџаците едноставно за да имаат еден вид резервна варијанта за затоплување на домот доколку се појави каков било проблем со другите начини на греење. Сепак, иако побарувачката за нашата работа е голема, сепак нема доволно заинтересирани луѓе што би сакале да работат како оџачари – вели тој.

Според оџачарите, исклучително важно е да се чистат оџаците редовно, бидејќи неисчистениот оџак може да биде причина за многубројни проблеми.

– Чистењето на целиот чадоводен систем е многу важно. Со исчистениот оџак се намалува можноста за опожарување, потоа се заштитува околината, а се намалува и загадувањето – вели Поповиќ.

За својата услуга оџачарите наплаќаат во зависност од видот на оџакот, но и од катноста на објектот. Цената на нивната услуга се движи во просек од 1200 па сѐ до 3000 денари.

Во изминатите неколку години, загревањето на домаќинствата, индустриските објекти и на сообраќајот постојано беа потенцирани како три најголеми извори за загадување на воздухот во Скопје. Во обид да се намали бројот на домаќинства што користат огревно дрво, властите субвенционираа набавка на инвертер клима-уреди и набавка на печки на пелети. За да се добијат субвенции за набавка на клима-уреди, градските власти бараа од граѓаните да ги одложат печките на кои се грееле како еден вид на доказ дека откако ќе набават инвертер ќе престанат да се греат на дрва и ќе преминат на загревање на домот на струја.

Оџаците во зградите се уриваат за да се добие квадрат плус

Во обид да добијат уште неколку квадрати плус или затоа што не сакаат низ домот да им поминува оџак, голем број скопјани ги урнаа оџаците. Токму поради тоа во зградите каде што некогаш имало можност становите да се греат со дрва, сега во голем дел од нив ваквиот начин на загревање е невозможен.

– Овој проблем на терен е многу голем, бидејќи граѓаните што живеат во згради, кои имаат оџак од најразлични причини го срушиле , па и да сакаат немаат никаква можност да загреваат на дрва. До 2005 година, задолжително, во секоја новоизградена зграда мораше да има оџак, но за жал, од тогаш па до денеска многу работи се сменија, па така во ниту една нова зграда нема изградено оџак – вели оџачарот Поповиќ.