Американскиот претседател Доналд Трамп денес изјави дека постои можност да не присуствува на претстојниот самит на Г20 и дека смета дека ќе се сретне со кинескиот претседател Си Џинпинг до крајот на годината.

„Мислам дека можеби ќе испратам некој друг (на самитот на Г20) бидејќи имав многу проблеми со Јужна Африка, тие имаат многу лоши политики“, им рече Трамп на новинарите за време на летот на „Ер Форс Уан“.

Трамп не даде дополнителни детали за можна средба со Си пред крајот на годината. Тој рече дека ќе почне да воведува царини за Русија во рок од десет дена доколку Москва не постигне напредок кон прекинување на војната во Украина. Додаде дека не е загрижен за потенцијалното влијание на санкциите врз Русија врз пазарот или цените на нафтата, велејќи дека САД ќе го намалат производството на нафта за да ги неутрализираат сите негативни влијанија.

Зборувајќи за денешната изјава на британскиот премиер Кир Стармер дека Велика Британија ќе ја признае државата Палестина ако Израел не преземе „конкретни мерки“ во Појасот Газа што би го подобриле животот на Палестинците, Трамп рече дека не разговарал за одлуката на Лондон со Стармер. „Не разговаравме за тоа. Кога го правите тоа, го наградувате Хамас. Не мислам дека треба да бидат наградени“, смета Трамп.

Тој додаде дека САД испратиле пари за помош во храна на Палестинците во Газа и рече дека сака да се осигура дека парите се потрошени правилно.