Пред почетокот на новата учебна година завршија или се при крај реновирањата кои се направија во неколку основни училишта во општина Аеродром во текот на летото.

Од Општина Аеродром информираат дека во ОУ „Браќа Миладиновци“ е реновирана училишната спортска сала, која ќе овозможи подобри услови за спортските активности на учениците. Во основното училиште „Блаже Конески“ се молерисуваат ѕидовите и се поставува фасада на новиот дел од објектот, каде неодамна беа заменети и прозорците, што значи дека училиштето ќе биде енергетски ефикасно.

Во ОУ „Љубен Лапе“ целосно е реновиран главниот влез, вклучувајќи нова фасада, гранитни нелизгачки плочки на платото и скалите, како и железна ограда за поголема безбедност на учениците. Обновени се и две училници и варосани ходниците на првиот кат, а главниот влез се реновира и во училиштето „Александар Македонски“.

Нашата цел е секое дете да учи во безбедна и современа средина. Со овие значајни инвестиции во реновирањата на училиштата, создаваме подобри услови за учење и развој на младите генерации во Аеродром. Ќе продолжиме да вложуваме во инфраструктурата за квалитетно образование и безбедност на учениците, изјави градоначалникот Дејан Митески, кој денес ги посети овие училишта.