Поштенските услуги низ Европа, Азија и Пацификот ги запираат испораките на пакети во САД, во очекување на новите правила што стапуваат на сила во петок, 29 август. Администрацијата на претседателот Доналд Трамп минатиот месец објави дека ќе го укине ослободувањето „де минимис“ за меѓународни пратки без царина во вредност помала од 800 долари, што овозможува увозот да се врши со минимална бирократија, почнувајќи од 29 август.

Ослободувањето претходно требаше да остане на сила до 1 јули 2027 година, како дел од даночен закон. Секој пакет сега ќе подлежи на царини помеѓу 80 и 200 долари. Новите правила не влијаат на писмата и малите пакети во вредност до 100 долари, декларирани како „подароци“. Според американската царина, вкупно 1,36 милијарди пакети што содржат стока во вредност од 64,6 милијарди долари биле испратени според оваа клаузула во 2024 година.

Државните поштенски служби и приватните оператори од Германија до Сингапур изјавија дека ќе ги суспендираат своите услуги бидејќи американските власти сè уште не дале доволно информации за тоа како ќе се собираат давачките, објави „Фајненшл тајмс“, пренесува БТА.

Британската кралска пошта планира да ги запре испораките во САД во вторник, 26 август, за да им даде време на пратките да пристигнат пред да стапат во сила новите правила. Поштенските служби во Германија, Данска, Шведска и Италија објавија дека ги суспендираат повеќето пратки до Соединетите Американски Држави. Франција и Австрија ќе го следат примерот на 25 август, објави Асошиејтед Прес.