Националниот џез-оркестар одлучи да не го откаже, туку го потврди терминот на концертот со извонредната Марија Мендеш, што ќе се одржи на 25 март, во Националната опера и балет, со почеток од 20 часот, а концертот ќе има хуманитарна димензија.

Извонредната португалска пејачка и композиторка Марија Мендеш живее во Холандија. Диригент на концертот, на кој ќе настапи заедно со Националниот џез-оркестар во Скопје, ќе биде маестро Владимир Николов. Музиката на Мендеш претставува уникатна мешавина од џез и португалска фадо музика, a нејзините изведби имаат добиено признанија од истакнати музички легенди, како Квинси Џонс, Вејн Шортер и Хермето Пашкоал, кои ја опишуваат како „џез-пејачка од највисок ранг“.

Заедно со пијанистот и аранжер Џон Бизли, Марија Мендеш решава старите фадо нумери да ги изведе во модерно, џез-руво. Овој органски спој им носи четири Греми номинации за двата албума: „Close To Me“ (2019) и „Saudade, Colour of Love“ (2022), од кои вториот беше аранжиран за џез-ансамбл и камерен оркестар со гудачка и дрвена дувачка секција, изведен со познатиот холандски оркестар „Метропол“.

Токму овој материјал, дополнително обработен за Биг-бенд оркестар од страна на Владимир Николов, Марија Мендеш и Јесе Пасение, ќе биде изведен во оваа специјална пригода на концертот со Националниот џез-oркестар.

Покрај неколку легендарни фадо песни во репертоарот, значајно е што легендарниот Хермето Пашкоал ѝ посвети песна на пејачката со неговата експериментална верзија на фадо, изведена без зборови. Една од омилените песни на Марија е „Com Que Voz“, стара песна од Португалија чиj текст датира од пред 500 години, напишана од поетот Луиш де Камоеш, кој многумина го сметаат за португалски Шекспир. Оваа песна ја поставува атмосферата за публиката да стане сведок на една незаборавна вечер на музика, каде што богатиот оркестарски звук на Биг-бенд оркестарот создава искри кога се среќава со возбудливата интеракција на страсниот глас на Мендеш, која пее приказни за „saudade“, копнеж и љубов.

Концертот на Марија Мендеш и Националниот џез-оркестар, кој беше претходно откажан, сепак ќе се одржи, но овој пат со хуманитарна цел. Средствата од продажбата на билетите ќе бидат донирани за семејствата на настраданите и повредените во Кочани. Во фоајето на Македонската опера и балет ќе бидат поставени и кутии за донации во кои ќе може дополнително да се донираат средства.

(Текстот е објавен во „Културен печат“ број 273, во печатеното издание на весникот „Слободен печат“ на 22-23.3.2025)