Пратениците од грчката владејачка партија Нова демократија, во изминатите два дена детално беа информирани од надлежните министри за предлог-законот на Владата за истополовите бракови, додека пак владиниот портпарол Павлос Маринакис изрази оптимизам дека законот ќе биде изгласан.

Легализирањето на истополовите бракови во изминатиот период е една од главните теми во Грција, иако конкретниот закон сè уште не е официјално соопштен, ниту пак донесен на владина седница, а несогласувања имаше од пратеници на владејачката партија.

Вчера и завчера, поделени во две групи пратениците беа детално информирани, а двајца, кои претходно беа против, синоќа изјавија дека веќе го промениле ставот и ќе го поддржат законот.

Портпаролот на грчката Влада Павлос Маринакис во интервју за грчката телевизија „Скај“ денеска рече дека на состаноците имало многу конструктивен дијалог со аргументи и со правна анализа.

-Верувам дека се одговорени сите прашања што пратениците ги донесоа од нивните изборни региони. Ние сме многу оптимисти за усвојувањето на законот, рече Маринакис и потсети дека пратениците ќе гласаат по нивната совест и нема да се воведе партиска дисциплина.

Меѓу пратениците од Нова демократија, кои се против законот е и поранешниот премиер Андонис Самарас.

Предлог-законот за истополовите бракови, според грчките медиуми, се очекува на крајот од месецов да биде презентиран на владина седница, а потоа да биде доставен и до Парламентот.

Од опозициските партии, се чини дека мнозинството ќе го поддржат, со исклучок на радикално десничарските Грчко решение, Победа и Спартанци.