Шпанскиот плејмејкер Иско ја доби наградата за најдобар фудбалер на сезоната во Конференциската лига, соопшти Европската фудбалска федерација (УЕФА).

Искусниот организатор на играта на Реал Бетис одигра клучна улога во историската сезона на андалузискиот клуб, која првпат ги одведе до европско финале. Иако Бетис загуби од Челси со 4-1 во големото финале, Иско блескаше на секој натпревар и беше моторот на тимот.

Во текот на натпреварувањето, 33-годишниот поранешен фудбалер на Реал Мадрид запиша девет настапи, постигна два гола и оствари три асистенции, што беше доволно за да ги освои симпатиите на стручната јавност и УЕФА.

Покрај ова индивидуално признание, УЕФА го објави и идеалниот тим на сезоната, во кој се најдоа и неколку фудбалери на европскиот шампион Челси. Меѓу нив се голманот Јоргенсен, дефанзивецот Тосин и креативниот Енцо Фернандез. Од редовите на Бетис, покрај Иско, место доби и Сабали.

Во најдобрата единаесетка се најдоа и други имиња кои оставија силен впечаток: Госенс од Фиорентина, Сешлар од Целје, Пулули од Јагјелонија, Нгуен од Ѓургарден, како и Кол Палмер од Челси.