Поранешниот англиски фудбалер Енди Керол двапати бил испрашуван од грчката полиција поради серија расправии со неговата девојка, шминкерката Лу Тиздејл, додека летувале на Миконос, пишува „Дејли мејл“. Керол (36) бил испрашуван поради инциденти во ресторан и хотел.

За првиот настан, вработен во таверната „Николус“ изјавил дека Керол изгледал многу пијан и бесен на својата партнерка.

„Користеше многу навредливи зборови. Однесувањето му беше непримерно. Жената изгледаше многу вознемирено“, рекол тој.

„Полицијата разговараше со него. Му беше дозволено да се врати, а парот го напушти ресторанот откако ја платија сметката. Кога дојде полицијата, Енди беше многу смирен, стана и разговараше со нив надвор од ресторанот“, додал вработениот.

Неколку часа подоцна, полицијата повторно била повикана, овојпат на барање на хотелскиот персонал, по пријава за штета во собата. Керол бил одведен во полициска станица на испрашување, но не бил уапсен и не биле покренати дополнителни постапки. Хотелски вработен потврдил дека Керол скршил врата.

Таа ноќ, Тиздејл го напуштила хотелот и преноќила во „Сохо рок хаус“.

Во заедничка изјава, парот соопштил: „Додека вечеравме приватно во ресторан за време на мирен одмор на Миконос, дојде до жестока расправија каква што имаат многу парови. Брзо стана јасно дека нема потреба полицијата да биде таму. Излеговме од ресторанот заедно со полицијата поради нивна инсистенција да нè ‘испратат’. Според нас, љубопитната јавност ја преувелича ситуацијата. Никој не беше уапсен, ниту обвинет. Ние сме многу среќни, заљубени и се радуваме на заедничката иднина, а разочарани сме што приватен недоразговор стана јавна работа“.

Инаку, Тиздејл и Керол започнаа врска минатата година, откако фудбалерот во септември се раздели од својата сопруга, ѕвездата на реалното шоу TOWIE, Били Маклоу, по две години брак.

Инаку, и во 2022 година, Керол бил на раб да ја изгуби тогашната свршеница Били, откако беше фотографиран пијан како спие со две жени во кревет за време на момачка вечер во Дубаи. Били му прости откако една од жените изјави дека ништо не се случило.

Но, помалку од две години по венчавката, бракот заврши – Керол потврди дека поднеле барање за развод.

„Били и јас се разделивме приватно претходно оваа година и постапката за развод е во тек. Тоа беа неколку тешки месеци за нашето семејство, но продолжуваме понатаму во добар дух, поради нашите деца“, изјави тој.

Керол и Били имаат три заеднички деца – Арла, Волф и Марвел Меј, а Били ги одгледува и неговите две деца од претходна врска – Емили Роуз и Лукас.