Поранешниот фудбалер на Ајакс, Манчестер сити и Атлетико Мадрид, Кики Мусампа, е уапсен во Холандија под сомнение за даночна измама вредна над 100.000 евра.

48-годишниот Мусампа, кој во моментов е дел од младинскиот стручен штаб на Ајакс, бил приведен во вторникот, а по еднодневен притвор во средата бил пуштен на слобода.

Според холандското обвинителство, тој пријавувал дека живее во странство, иако истовремено работел и остварувал приходи во Холандија, со што, како што се тврди, го оштетил државниот буџет за значителна сума.

Во рамките на истрагата, била извршена рација во неговиот дом каде што запленети се документи и неколку скапоцени часовници, а бил приведен и неговиот 65-годишен сметководител, кој се сомничи за соучество.

Холандските медиуми потсетуваат дека ова не е прв даночен проблем за Мусампа, неодамна му бил одземен недвижен имот во Амстердам, поради долгогодишни нерасчистени обврски кон даночните власти. Од Ајакс засега немаат официјален коментар, освен кратката изјава дека е „прерано за реакција“ и дека ќе го следат развојот на случајот.