Холивудскиот актер Чарли Ханам откри колку далеку отишол за да го портретира озлогласениот убиец Ед Геин во третата сезона од популарната серија на Нетфликс „Monster: The Ed Gein Story“. Актерот признава дека неговата физичка и ментална трансформација воопшто не била лесна, но верува дека ова било клучот за убедлива изведба.

„Барањето на вистината всушност беше целиот процес“, рече Чарли Ханам на премиерата на серијата во Њујорк во интервју за „Пипл“. „Повеќе нè интересираше зошто Ед го направил тоа што го направил отколку она што го направил. Сите веќе ги знаат деталите за злосторството, но нашата цел беше да разбереме што го натерало да дојде до нив.“

Во серијата, Ханам го игра еден од најозлогласените американски убијци на 20 век, човек кој ја шокираше јавноста во 1950-тите ограбувајќи гробови и користејќи човечки останки за изработка на предмети за домаќинството и облека.

Нова сезона на „Чудовиште“: Приказната за Еди Геин е толку ужасна што била инспирација за некои од најстрашните хорор филмови, меѓу кои и „Психо“

За да го прикаже Геин што е можно поверодостојно, Ханам драстично го промени својот изглед. „Тој беше многу слаб, неухранет човек, без вистински социјален контакт. Значи, првиот чекор беше да ослабам 14 килограми, за да можам да изгледам како него“, откри актерот.

Тој особено се фокусирал на сложениот однос на Геин со неговата мајка. „Таа секој ден му велеше дека го мрази затоа што не е роден како девојче, што таа посакувала. Замислувањето на последиците од таков однос ни помогна да ја разбереме неговата психа и како тој би комуницирал со неговата мајка и со светот – секогаш обидувајќи се да биде ќерка каква што таа сакала“, рече Ханам.

Иако улогата е исклучително мрачна и психолошки напорна, актерот тврди дека таа не го оптоварила емоционално надвор од сетот. „Темата е тешка, но самиот процес на снимање беше полн со позитивна енергија. Сите се чувствувавме добро во врска со работата што ја завршивме. Тоа искуство беше многу исполнувачко и убаво за мене, особено поради соработката со режисерот Макс Винклер, мојот драг пријател“, заклучи Ханам.