Главниот град на БиХ, Сараево, во последниве месеци се бори со сѐ почестите дојави за бомби. Судовите и училиштата се најчестите мети на ваквите дојави. По сите полициски проверки беше утврдено дека ваквите дојави се лажни.

Како што пишува босанскиот медиум „Кликс.ба“, ваквите лажни дојави сериозно ја парализираат работата на институциите.

Така, во периодот од почетокот на годинава до 28 март, поради шест лажни пријави за подметнати бомби, во Општинскиот суд во Сараево беа одложени вкупно 720 рочишта.

Како што се наведува во официјалното соопштение на Општинскиот суд во Сараево, оваа честа појава предизвикува евакуација на сите вработени во Општинскиот суд во Сараево, што секако влијае на резултатите од работата на судиите, судските одделенија и судот во целина.