Долгите редици туристи пред катедралата „Саграда Фамилија“, ремек-делото на архитектот Антони Гауди се вообичаена глетка во Барселона. Освен што е најпопуларна туристичка атракција во Шпанија, катедралата е позната по нејзиното долгогодишно доградување. Сега конечно се наѕира крајот на градбата, но започнуваат главоболките на околните жители.

Имено, доколку се продолжи со плановите за изградба на џиновско скалило што ќе води до недовршениот главен влез на катедралата, ќе биде потребно да се срушат три градски блокови со станови. Тоа значи дека повеќе од илјада семејства би требало да бидат иселени од околината.

Фондацијата што го води проектот за доградување на катедралата се чини дека има намера да продолжи со плановите и покрај противењето од здружението на околните станари. Конечната одлука ќе ја донесе градскиот совет на Барселона, пишува „Евроњуз“.

Започната е правна постапка за стопирање на каква било работа на предложените скали, од страна на адвокатот и претставник на здружението на граѓани. Имено, тој тврди дека архитектот Гауди не ги предвидел скалите во првичните планови, туку дека тоа е плод на неговите студенти по смртта на архитектот во 1926 година.

„Тоа не е во планот на Гауди, но ќе влијае на животите на околу 3.000 луѓе кои живеат во близина на базиликата. И на мојот живот, јас живеам таму 30 години, некои луѓе и подолго“, изјавил Баросо за „Еуроњус“.

Во случаите на експропријација, единствениот кој ја носи конечната одлука е локалниот совет. Но, засега градскиот совет на Барселона избегнува да донесе одлука за ова прашање, а одлуката за уривање би била особено тешка со оглед на претстојните избори на 28 мај.

„Работиме со претставници на Саграда Фамилија, околните жители и други организации со цел да се најде најдоброто решение за да се завршат работите, но и да се почитуваат потребите на граѓаните“, изјавил портпаролот на градските власти.

Инаку, списокот на културно наследство на УНЕСКО го вклучува само делот од базиликата што бил завршен за време на животот на Гауди.