Познатиот американски синџир ресторани „Кентаки фрајд чикен“ (КФЦ) привремено ќе престане да го користи долгогодишниот слоган „Добро е, прсти да излижеш“, бидејќи го сметаат за несоодветен во време на пандемијата на ковид-19, кога личната хигиена стана главен приоритет во спречувањето на пренос на болеста.

Во време кога заштитните маски и миењето на рацете станаа норма, а здравствените власти ги советуваат луѓето да престанат да ги допираат лицата, КФЦ наведува дека слоганот „не е соодветен“.

Слоганот „Прсти да излижеш“, што Џем Брендс, сопственик на брендот, го користи 64 години, ќе биде привремено отстранет од огласувањето низ целиот свет и ќе се користи повторно кога ќе дојде време за тоа, соопшти компанијата.

– Се наоѓаме во уникатна ситуација. Имаме познат слоган што не се вклопува во сегашното опкружување – рекла главната директорка за маркетинг на КФЦ.