Полска ќе купи 116 користени тенкови „Абрамс“ од САД, изјави полскиот министер за одбрана, додека Варшава ги зајакнува своите вооружени сили по руската инвазија на Украина.

Полска вети дека ќе ги зголеми трошоците за одбраната на 3% од бруто домашниот производ и ќе ја зголеми нејзината армија за да спречи каков било можен напад по руската инвазија на Украина на 24 февруари, најголемиот конфликт во Европа од Втората светска војна.

„Склучивме договор со САД за купување на 116 користени тенкови Абрамс под повластени услови“, изјави Мариуш Блашчак за јавната телевизија ТВП Инфо, додавајќи дека договорот „значително ќе ги зајакне“ одбранбените способности на Полска.

Договорот доаѓа како додаток на веќе склучениот договор од април за купување на 250 тенкови Абрамс.