Напаѓачите кои се обидоа да го убијат Радоје Звицер имале половина милион евра кои требало да ги поделат после успешниот атентат, а дополнително и 100.000 евра платени трошоци за престој во Украина, скривање и бегство.

Овие детали се утврдени во рамки на истрагата за обидот за убиство на Радоје Звицер. Дополнителни, како мотив за обидот за убиство на Звицер, кој важи за еден од водачите на кавачкиот клан, се наведува одмазда за убиството на Игор Дедовиќ и Стеван Стаматовиќ во Атина. Напаѓачите добиле околу половина милион евра за извршување на ова кривично дело, а наводно и околу 100.000 евра за трошоците за престој во Украина, објави „Дан“.

Звицер е тешко ранет на 26. мај минатата година во кварт во Киев кадешто живеел. Поради нападот на Звицер, уапсени се Стефан Ѓукиќ од Бар, првоосомничен за убиството на сограѓанинот Јован Клисиќ и ранувањето на Велизар Гардашевиќ, подгоричанецот Емил Тузовиќ и српските државјани Петар Јовановиќ и Милан Бранковиќ. Во рамки на истрагата за овој случај приведен е и службеник на украинската полиција Ростислав Чернобриви.

Сопругата ги избрка напаѓачите

Украинскиот портал Детектив инфо претходно објави дека Тамара Звицер пукала на напаѓачите кои го раниле нејзиниот сопруг Радоје.

– Нејзините постапки ги спречија убијците работата да ја истераат до крај. Таа ги принуди да побегнат. Украинските полицајци не успеаја да го пронајдат куќиштето од пиштолот или патроните од оружјето кое сопругата на Радоје Звицер ги користела во текот на пресметката со напаѓачите. Таа веројатно ја фрлила цевката, наведува извор за порталот Детектив инфо.

Тој портал објави дека и Тамара Звицер на територијата на Украина развила легален бизнис и дека заедно со Г.З. и М.З. е сопственик на компанијата „Интерфудтехнолоџи ЛЛЦ“, регистрирана во ноември 2018 година во Полтава, која работи во областа на угостителството.

Оваа 35-годишна которчанка, која била сведок на злосторството во Киев, беше мета на напад во 2016 година во Котор. Тогаш непознати лица пукале на автомобилот во кој била Звицер. Не е откриено кои биле напаѓачите.

По обидот за убиство на Звицер, шефот на украинската полиција Игор Клименко рече дека „главни причини за обидот за убиство биле криминалните активности на жртвата, можна прераспределба на сферата на влијание внатре во самата организација и меѓу балканските криминални кланови кои ја контролираат трговијата со дрога“.

Во Украина се уапсени Македонец, Србин и Црногорец по обид за убиство (ВИДЕО)

Планирање на злосторството

Како што пренесе порталот Обозревател, во киевскиот Печерски округ двајца неидентификувани мажи раниле државјанин на Црна Гора, кој потоа е хоспитализиран. Нападот се случил на територијата на елитниот станбен комплекс Новопечерски Липки, во улицата Драгомирова. Напаѓачите го запалиле автомобилот кој го користеле, при што еден од нив се здобил со изгореници на лицето.

За нападот кој го запрела Тамара се криеле месеци планирање. За четири месеци напаѓачите му влегле во трага на Звицер, го следеле неговото движење и го планирале злосторството.

Кога споменатите осомничени се уапсени во Одеса, во соработка со црногорската и украинската полиција почнаа да испливуваат детала од подземјето. Со оглед на тоа што Ѓукиќ и Тузовиќ биле блиски до барската група предводена од Кожар, истражителите почнале да го склопуваат мозаикот. Ѓукиќ во Украина е фатен со македонски пасош.

Тамошната полиција откри дека оваа група пристигнала во Украина во почетокот на мај, го купила возилото кое е користено во нападот, како и автоматско оружје и го следела семејството Звицер.

Кожар е ликвидиран на 23. јули на Крф, само два месеци по нападот на Звицер. Истражителите се сомневаат дека и „кавачкиот клан“ дошле до информации кој е предводник на нарачаното убиство.

Таргетирање и одмазда

– Одредувајќи го датумот за убиство, обвинетите ја чекале жртвата во близина на нејзината куќа. Откако испукале пет куршуми во жртвата, двајца сторители влегле во автомобилот и го напуштиле местото на злосторството. Подоцна отишле и го запалиле автомобилот за да ги уништат доказите, соопшти тамошната полиција.

Неговото име со фотографија се најде на 15-минутната снимка објавена на ЈуТјуб во декември 2017 година, со која е размрдано дејствувањето на оваа криминална организација.

Откриени се детали кои се однесуваат на „деловните потфати“ на кавачкиот клан, како и имињата на државите во кои дејствуваат и лажните идентитети кои ги користат.

Еден од платените убијци кои пукаа во црногорскиот мафијаш во Киев имал македонски пасош (ВИДЕО)

На снимката тогаш е објавено дека Звицер, кој важи за водач на кавачкиот клан, се служи со туѓ идентитет и дека под името Јосип Бабиќ, непречено патува низ Европа, користејќи идентитет на босански државјанин роден во Германија, во Нирнберг.

Звицер ја напуштил Црна Гора кога почна крвавата војна меѓу овие две групи во кој прва жртва беше Горан Радоман.

Зад нападот се крие одмазда за убиството во Атина

Игор Дедовиќ и Стеван Стаматовиќ се убиени на 19 јануари 2020 година додека со сопругите и децата седеле во еден ресторан во Атина. Според евиденцијата на црногорската полиција, Стаматовиќ и Дедовиќ биле блиски до шкаљарскиот клан, па истражните органи веруваат дека се работи за продолжение на војната меѓу две спротивставени криминални групи од Котор која досега однесе повеќе од 50 животи. Двојното убиство во Атина е една од најбруталните ликвидации зошто е извршена пред сопругите и децата на жртвите.