Европската комисија планира сеопфатна реорганизација на својата администрација до почетокот на следната година, а претседателката на Европската комисија, Урсула фон дер Лајен, се залага за реструктуирање за зголемување на ефикасноста и намалување на оперативните трошоци на администрацијата, пишува Политико, повикувајќи се на интерен документ што го видела.

Според документот, на европскиот комесар за буџет и јавна администрација, Пјотр Серафин, му е доделена задачата за „сеопфатна ревизија на организацијата и функционирањето на Комисијата, со компаративна анализа со надворешни стандарди“.

Според Политико, целта е да се воспостави „модерна и ефикасна јавна администрација способна за спроведување на политичките приоритети“, а воедно да се прилагоди на новата реалност на непредвидливост, намалувајќи ја сложеноста и трошоците, пренесува Танјуг.

Двајца претставници на Комисијата, зборувајќи под услов на анонимност, рекоа дека се разгледуваат алтернативни модели, вклучително и можноста за спојување на одделите. До крајот на 2026 година, Комисијата планира да ги елиминира „непотребните процедури“ и да поттикне „заедничка работа“, по сеопфатна анализа на распределбата на одговорностите во рамките на институцијата.

На есен ќе биде формирана и работна група на високо ниво за давање совети за време на процесот, додека формалниот почеток на прегледот е планиран за крајот на 2025 година или почетокот на 2026 година, според „Политико“.

Портпаролот на Комисијата потврди за порталот во Брисел дека експертската група ќе има помеѓу седум и девет члена, главно од јавниот или полујавниот сектор и академијата, со експертиза во областите на дигитализација и реформа на јавната администрација.

Европската комисија, која го извршува поголемиот дел од секојдневната административна работа на ЕУ, вработува околу 32.000 луѓе кои работат на различни аспекти на бирократијата.