Холандскиот лидер на крајната десница, Герт Вилдерс, се закани дека ќе ја собори кревката владина коалиција ако неговите строги барања за имиграцијата не бидат исполнети „во рок од неколку недели“.

По победата на парламентарните избори во ноември 2023 година, крајно десничарската Партија на слободата (ПВВ) има најголем број пратеници во холандската владина коалиција, а доколку партијата ја напушти, тоа би можело да предизвика политичка криза и да ја доведе земјата до нови избори.

„Нашето трпение сега е при крај. Гласачите кои ја доведоа ПВВ на прво место имаат право на влада која ги исполнува своите обврски“, рече Вилдерс на брзо закажаната прес-конференција.

Лидерот на ПВВ презентираше план од десет мерки кои, според него, мора да се спроведат „најмногу во рок од неколку недели“.

Мерките вклучуваат затворање на границите за барателите на азил, зајакнување на граничните контроли и депортација на лицата со двојно државјанство кои се осудени за кривично дело.

„Да престанеме да отвораме центри за азил. Ајде да ги затвориме“, побара популистичката крајна десница. Десетици илјади Сиријци ќе мора да се вратат во својата земја. И ако, како странци, сериозно ги пречекорите границите и се однесувате лошо, мора да ја напуштите земјата“, продолжи Вилдерс. „Ако, промените не се доволни или ако ништо не се промени, тогаш ќе си заминеме“, предупреди тој.

Вилдерс призна дека целосното спроведување на некои мерки ќе потрае повеќе од неколку недели, но сепак побара потребните одлуки да се донесат што е можно поскоро.

Крајнодесничарскиот лидер во други прилики се закани дека ќе ја повлече својата партија од владината коалиција, но владата предводена од премиерот Дик Шуф ​​досега преживеа.

На изборите, ПВВ освои 37 места во парламентот со 150 места, што ја прави убедливо најголемата партија во коалицијата.

Неодамнешните анкети покажуваат дека поддршката за ПВВ се намалува. Сепак, таа е сè уште една од трите главни партии, заедно со либералната ВВД и левичарската Лабуристичка/Зелена партија.