Полициски службеници од Секторите за внатрешни работи Тетово и Штип во текот на вчерашниот ден реализираа повеќе превентивни активности од области важни за локалната заедница и генерално од општ јавен интерес.

Како што информира денеска МВР, на подрачјето на СВР Тетово беше спроведена активност за превенција од имотни деликти (кражби и измами), со акцент на информирање на граѓаните за начините за заштита од имотни деликти и за неопходноста од благовремена комуникација со полицијата за побрзо расчистување на случаите.

На подрачјето, пак, на СВР Штип, Отсекот за превенција при СВР Штип пред спортската сала на ОУ „Тошо Арсов“ и Градскиот стадион во Штип спроведе превентивна активност во рамки на проектот „Да навиваме спортски и безбедно“.

Од МВР посочуваат дека во текот на активностите биле поделени и летоци со едукативна содржина, а на граѓаните им било укажано дека не смее да се истакнуваат транспаренти, знамиња и други предмети со текст или слики што поттикнуваат омраза и насилство и дека за својот клуб треба да се навива спортски. На граѓаните им биле презентирани и основните законски одредби за спречување на насилство и недостојно однесување на спортски натпревари.