Иако случајот беше пријавен истиот ден (9 април) кога се извршени кражбата и вандализмот врз споменикот на децата-бегалци од Егејска Македонија во скопскиот парк „Жена-борец“, полицијата за тоа извести дури денеска, на 15 април.

Во полицискиот билтен не се наведува кога се случила кражбата, во која крадците го однеле бакарниот релјеф и десетина метри бакарни цевки од фонтаната (не спомен-плочата, како што велат од МВР):

„Во СВР Скопје било пријавено дека од паркот „Жена борец“ во Скопје од споменик на култура на Македонците од Егејскиот дел на Македонија со употреба на физичка сила била одземена спомен плоча. Се преземаат мерки за расчистување на случајот“, кусо велат од МВР, шест дена откако се случи кражбата во најстрогиот центар на Скопје, преку улица од македонското Собрание и на педесетина метри од стражарската куќичка пред Собранието, во која и додека крадците го сквернавеле споменикот, морало да има полицаец.

Во меѓувреме, изминатите денови реагираше авторот на спомен-обележјето, архитектката Даница Павловска-Циги, која изрази огорченост од незаинтересираноста на надлежните институции за негова заштита. Реагираа и повеќе здруженија на децата-бегалци од Егејска Македонија, кои побараа полицијата да ги најде сторителите на вандалскиот чин.

Само авторката Павловска и граѓански здруженија реагираат откако беше уништен споменикот на децата-бегалци од Егејска Македонија спроти Собранието