Полицаец од Полициската станица Чаир доби кривична пријава откако потпишал и подигнал 11 лични карти без да ги достави понатаму, со што на граѓаните им била нанесена материјална штета и им било ограничено правото навремено да ги добијат документите.

Полицискиот службеник Д.С. се сомничи за кривично дело „несовесно работење во службата“ по член 353-в став 4 од Кривичниот законик.

Според пријавата, полицискиот службеник во просториите на Одделението за управни работи Скопје потпишал и подигнал 11 лични карти и список со извештај за скенирани документи на жители од подрачјето на ПО Мировци во Чучер Сандево.

Наместо да ги достави во полициското одделение, за да можат граѓаните навремено да ги подигнат, тој не ги предал, ниту, пак, ги евидентирал, по што било утврдено дека документите исчезнале.

Со ваквото постапување, на граѓаните им е нанесена материјална штета и им е ограничено правото навремено да дојдат до личните карти.

Полицијата најави и дисциплинска постапка против осомничениот, кој ќе биде разоружан, ќе му биде одземено службеното оружје и ќе биде суспендиран до завршување на постапката.