Книжевната резиденција на поетесата Валентина Бакти, која се реализираше во текот на јули, заврши со настанот „Скопски колажи“, како еден вид омаж за Скопје, што во организација на издавачката куќа „Готен“ се одржа на 27 јули во кафе-книжарницата „Буква“.

На настанот беа претставени изложба на колажи и писма. Писмата се разменувани за време на нејзиниот резиденцијален престој во Скопје со српскиот актер Ѓорѓе Живадиновиќ Гргур, а колажите се направени од фотографии што ги имаат создавано таа и фотографот Диме Данов.

Изложбата на писмата и колажите беше придружена со музичка изведба и читање поезија на Никола Маџиров, Владимир Мартиновски, Ѓоко Здравески, Иван Шопов и Андреј Ал-Асади.

„Би сакала овој омаж на Скопје на скопската публика да ѝ остави простор за впуштање во малку попоетичен поглед на градот или барем она што остана од градот“, објаснува Валентина Бакти.

„При спојувањето различни елементи, кои вклучуваат и писма, Валентина создава дела што содржат нешто повеќе од збирот на своите елементи. Овие дела, освен тоа што се колажи тие се и претстави на нашите лични импресии од градот, како негови привремени посетители“, смета Диме Данов.

Валентина Бакти (Прокупље, 1995) е поетеса, преведувачка, актерка и фотографка. Нејзината прва двојазична книга поезија, „Помеѓу“, ја има објавено издавачката куќа „Антолог“ од Скопје, а втората, „Да се скршат коските“, издавачката куќа „Дибидус“ од Белград.

Таа е и една од организаторите на Скопскиот поетски фестивал. При средбата со неа имате чувство дека е многу подолго во Скопје отколку што навистина била.

– Резиденцијата само ми остави доволно простор и време да се посветам на работата и благодарна сум на сѐ што ми беше пружено. Уште од првата средба Скопје ми ја даде мекоста на домот, каде што чекорам боса. Тоа е исклучително важен дел од мојот живот, а со тоа и од мојот уметнички израз. Во Скопје сум имала и имам прекрасни пријатели, планини, села, сеќавања, а се надевам дека ќе имам уште многу средби со прекрасната скопска публика. Би сакала целиот овој период да го сублимирам во една изјава од Љубомир Тошев: Сум страдал, ама убаво ми било – рече Валентина Бакти во изјава за „Културен печат“.

Резиденцијалниот престој на Валентина Бакти во Скопје беше поддржан од европската мрежа за превод и книги „Традуки“.

(Текстот е објавен во „Културен печат“ број 139, во печатеното издание на весникот „Слободен печат“ на 30 јули – 2 август 2022)