Граѓанската иницијатива „Подобро за Тетово“ ќе го прошири „фронтот“ и на престојните вонредни избори за Советот на општина Тетово ќе настојува да вклучи што повеќе групи од граѓанскиот сектор во нивната листа за советници. Но, како што нагласија од оваа иницијатива за „Слободен печат“, за нив не е битен бројот на освоени советници, туку програмските цели за кои се залагат да се приоритет на идниот совет, а тоа се транспарентност, отчетност, заштита и развој на зелените површини, модерна урбанизација на градот.

Елмедина Абдулахи од иницијатива „Подобро за Тетово“, актуелен советник во општина Тетово, вели дека сега кога имат искуство од еден изборен процес, на вонредните избори за Советот ќе настојуват да ги вкулчат во нивната иницијатива сите заинтересирани групи, лица кои се залагат за истите приниципи за кои се залага оваа иницијатива.

– Ние сегогаш сме отворени за тие кои сакаат да ни се придужат, а кои споделуват исти вредности со нас. Сега кога нашите цели веќе се покажа практично дека се во интерес на граѓаните, сметам дека ќе ни се приклучат повеќе активисти. Ќе има и политички опструкции но тоа ја прави трката уште помотивирачка за граѓаните кои се залагат за почиста животна средина и подобар среден град. За нас не е битно колку советници ќе освоиме, туку нашите определби за кои се залагаме, изјави Абдулахи за „Слободен печат“.

На 28 април општина Тетово ги информирала Министерството за локална самоуправа и за финансии дека Советот на општината не успеа да ја изгласа завршната сметка во предвидениот законски рок и со тоа се отвара патот за вонредни избори за општинскиот Совет.

Поранешниот член на Државната изборна комисија (ДИК), Енвер Салихи во изјава за „Слободен печат“ вели дека според настанатата состојба во општинскиот Совет во Тетово, изборите би се одржале во втората половина на месец октомври.

– Веќе се исполнете условите кои ги налага Законот за локална самоуправа согласно член 75 став 1 точка 4, но сепак по автоматизам не може да се распишат нови избори за Совет на Општина Тетово. Градоначалникот го известува Министерството за локална самоуправа, процедура која е веќе сторена според градоначалникот на Тетово и сега Министерство за локална самоуправа ја известува Владата во рок од 7 дена, по кој рок Влада на РСМ е должна во рок од 30 дена да донесе решение за распуштање на советот и истото се објавува во Службен весник. После овој чин Претседателот на Собранието распишува избори за Совет на град Тетово. Според мое мислење изборите би се одржале во втората половина на месец октомври кога и е предвидено според Изборен законик за редовните избори од причина што општиот рок од распишување до одржување на избори е 70 до 90 дена, додека за предвремено распуштање на советот не е предвидено некој специјален и пократок рок. Така што мислам дека се тактизира за одржувањето на изборите да биде во втората половина од октомври, како не би се направило грешка во чекори и истата да може да се оспори пред Уставен Суд или било кој орган, објасни Салихи.