„Дали сте за оддалечување на сите објекти кои приредуваат игри на среќа од училишта и верски објекти“? На ова прашање тетовци ќе треба да одговорат на престојниот референдум за кој иницијаторите од Движењето Антикоцкање, велат дека подготовките за организирање се при крај.

„Целта е да се прати порака до властите дека игрите на среќа кои се практично игри на несреќа, тетовци не ги сакаат. Но, исто така сакаме овој референдум да се организира на ниво на цела држава. Ние се консултиравме со политичките партии, кои се дел од Советот на Општина Тетово и со нив направивме средби. Јас мислам дека треба наскоро да се организира, но треба да се направат уште некои дополнителни консултации“, изјави Јуши  Емурлаи од Движењето Антикоцкање.

Од Општина Тетово, велат за дваесетти месецов е закажана уште една средба со политичките партии, кои се во состав на Советот на Општина Тетово, со цел референдумот да биде успешен.

„Намерата е да се пристапи посериозно за овој референдум, знаеме дека за еден референдум да биде успешен потребна е излезезност од над 50%, што во досегашната историја на било кои избори во Тетово не е забележана. Затоа ние имаме закажана уште една консултација со политичките партии и после таа средба ќе имаме еден унифициран став, какви ќе бидат следните чекори околу прашањето за референдумот“, рече Милена Вучевска, портпарол на Општина Тетово.

Од Антикоцкање, истакнаа дека Предлог-законот за игри на среќа, кој предвидува обложувалниците и казината, да бидат оддалечени од училиштата не помалку од 500 метри, во наредните два месеци, треба да се најде на дневен ред во Собранието и конечно да се изгласа. Истиот велат оттаму стои во собраниските фиоки повеќе од две години и конечно треба да стане дел од македонското законодавство и да започне да се применува.

„Навистина е дека голем дел од буџетот на државата се полни со даноците на казината. Но, тие пари треба да останат во џебот на граѓаните, оти државата ни стана Лас Вегас и црна дупка на Балканот“, вели Јуши Емурлаи од движењето Антикоцкање.