Американскиот претседател Доналд Трамп најави дека ќе основа Канцеларија за вера во Белата куќа и ја назначи јавната обвинителка Пем Бонди да ја предводи работната група за „искоренување на антихристијанските предрасуди“ во федералната влада, јави „Ројтерс“.

„Мисијата на оваа работна група ќе биде веднаш да ги запре сите форми на антихристијанска критика и дискриминација во федералната влада, вклучително и во Министерството за правда, кое беше апсолутно страшно, Службата за внатрешни приходи, ФБИ и други агенции“, рече Трамп на Националниот молитвен појадок.

Тој не даде конкретни примери за наводното антихристијанското расположение во државната управа.

Трамп, исто така, рече дека ќе формира нова комисија за верски слободи.

„Ако немаме верска слобода, тогаш немаме слободна земја“, рече тој.

Последните најави на Трамп наидоа на жестоки реакции на социјалните мрежи, а дел од корисниците во потегот на претседателот забележаа загрижувачка сличност со случувањата во романот „Приказната за слугинката“ (The Handmaid’s Tale) на Маргарет Етвуд и истоимената телевизиска серија, во која Соединетите Држави, по измачувачка граѓанска војна, ги управува репресивна теократска власт која ги укинува сите човекови и граѓански права.

Трамп се сменил по обидите за атентати: Американци, вратете го Господ во вашите животи