Граѓаните не се откажуваат од лошите навики да ги паркираат возилата каде ќе стигнат и притоа, ако е можно, да не платат за паркирање. За ова доволно говори и податокот што на неделно ниво казни за непрописно паркирање добиваат стотици граѓани кои ги оставиле автомобилите на паркинзи наменети за резиденти, на тротоари, на зелени површини. И додека „пајаците“ на двете јавни претпријатија, кои управуваат со паркинг просторите во Скопје, ПОЦ и „Градски паркинг“, имаат „полни раце“ работа, скопјани и понатаму си тераат по старо.

Три простори во строгиот центар на градот редовно се полни со непрописно паркирани возила иако таму паркирањето не е дозволено. Се празнат, само кога полицајците ќе се ангажираат со казнување, а два-три дена потоа, сѐ е по старо.

Рекреативците на кејот на Вардар се сведоци дека со години под мостот „Гоце Делчев“ од страната под Калето, редовно се паркирани десетици автомобили. Полицијата одвреме навреме казнува, но ситуацијата не се менува. Досега надлежните мораа да најдат начин да се спречи влегувањето со возила на кејот, една рампа, на пример, би била доволна.

Во услови кога паркирањето е најскапо токму во централното градско подрачје речиси е неразбирливо и зошто се толерира непрописното паркирање на тротоарите на потегот од раскрницата кај плоштадот Скендербег до зградата на Министерството за надворешни работи. Институциите кои се тука лоцирани имаат свои подземни паркинзи, па доколку станува збор за службени возила или за возила на вработени во овие институции, тогаш полицијата треба да постапи како што си пишува во законот и да казнува, како што ги казнува погрешно паркираните „обични“ граѓани. При тоа, очигледно се заборава дека и пешаците се учесници во сообраќајот, а не само автомобилите,дека за нив се предвидени тротоарите, кои треба да бидат слободни за движење.

Тротоари-паркинзи пред Министерството за надворешни работи: Каде се „пајаците“ и полицијата?

Од Министерството за внатрешни работи тврдат дека тековно преземаат мерки за непрописно паркираните возила и тоа на целото подрачје на Скопје.

Во периодот од 01.01.2024 до 17.09.2024 год. на булевар Гоце Делчев преземени се 283 мерки против сторители на прекршокот „непрописно запирање и паркирање“ и возилата се подигнати со специјално возило „Пајак“, додека на улицата Филип Втори Македонски преземени се 329 мерки против сторители на прекршокот „непрописно запирање и паркирање“ и возилата се подигнати со специјално возило „Пајак“. Воедно ве известуваме дека во континуитет од страна на Одделението за БПС ќе се преземаат соодветни мерки против сите видови на сообраќајни прекршоци – информираат од МВР.

Но, казните кои очигледно немаат голем ефект, не ги стигаат сите граѓани подеднакво. На улицата Даме Груев во близина на полициската станица „Беко“ пред која има голем паркинг, во непосредна близина на катната гаража „Беко“ редовно во едната лента на улицата има паркирани автомобили. Жителите од зградите велат дека тука паркираат вработени во полициската станица, кои знаат дека нема да бидат казнети.

Имаат паркинг тука, ама обично е полн и своите возила ги паркираат на улицата веднаш спроти катната гаража „Беко“. Секој ден е тоа така. За нив не важат ли законите? Зошто ние граѓаните мораме да внимаваме каде паркираме, да плаќаме паркирање, а тие не? Затоа што работат во полициска станица? Срамота! – вели еден од жителите.

Според него, наместо полицијата да биде пример за тоа како треба да се почитуваат правилата за сообраќајот во мирување, во случајов, некои од вработените во станицата покажуваат дека за секое правило постојат и исклучоци, кои поминуваат неказнето.

Кој да ги казни полицајците? Приватни возила на вработени во ПС „Беко“ редовно паркирани на улица, „пајаците“ не ги забележуваат