Десет различни пријави од компании, пристигнале до Владата за утврдување на статус на стратешки инвестициски проект. Не откривајќи за колкави инвестиции се работи, вицепремиерот Фатмир Битиќи, изјави, дека почнал процесот на селекција.

За стратешки проект се смета реализација на инвестиција од најмалку 100 милиони евра на територија на најмалку две или повеќе општини, најмалку 50 милиони евра во општините со седиште во град, општините во градот Скопје и градот Скопје и најмалку 30 милиони евра во општини со седиште во село.

Новиот Закон за стратешки инвеститори стапи на сила на почетокот на 2020 година, а рокот за аплицирање, заврши пред една недела. Статусот на стратешки инвестиционен проект може да се добие за проекти во енергетика со инфраструктура, транспорт и телекомуникации, туризам, преработувачка индустрија, земјоделство, шумарство и водостопанство, прехранбена индустрија, здравство, индустриски и технолошки паркови, управување со отпадни води и отпад, информатичко-технолошки зони, спорт, наука и образование, градење на големи мултифункционални градежни комплекси. По исклучок, ваков статус може да имаат и инвестиции, кои надминуваат износ од 150 милиони евра, објави Владата.