Само што го оставивме летото зад нас, а туристичките агенции почнаа наголемо да нудат прослава на Новата година во повеќе градови во соседството, регионот, но и за далечните дестинации. Но, ако сакате да славите далеку од дома, ќе треба добро да го истресете вашиот паричник, оти ексклузивните понуди почнуваат од неколку стотици па се до неколку илјади евра. Иако нема точна бројка колку Македонци ја дочекуваат најлудата ноќ во странство, дел од туристичките работници за „Слободен печат“ велат дека таа се движи до неколку десетици илјади. Од вкупниот број продадени аранжмани, најголемиот дел се со автобус, додека само 10 до 15 од вкупниот број продадени аранжмани се поскапи, со авион. Најголем е интересот за европските градови, а најпродаваните пакети се за Солун, Истанбул, Белград и Будимпешта. Од домашните дестинации, се бара место повеќе за Охрид, но и Маврово.

– Со оглед на фактот дека последниве години во Скопје се штеди на новогодишните украси и не се носат популарни естрадни ѕвезди, нема речиси никаков интерес, иако главниот град според туристичките билтени е најпосетувана дестинација преку целата година – велат од агенциите.

Соседството и регионот се секогаш најпродавани и тие аранжмани се продаваат многу брзо.

– Но, и покрај пристапната цена на аранжманот, има и такви што претпочитаат да патуваат порано или подоцна, а не за самата Нова година, најмногу поради фактот што повеќето автобуси тргнуваат во исто време, а има метеж на граничните премини. Сите поаѓања се или вечерта на 29 или на 30 декември. Зависи од должината на програмата. Исто така, најголемиот број од нив се враќаат на 2 или 3 јануари, а оние што платиле аранжмани за шест ноќевања, се враќаат само на 5 јануари – велат туроператорите.

Традиционално први се трошат аранжманите за поблиските дестинации како Будва, Белград, Солун, Истанбул и Будимпешта… кои секогаш привлекуваат со богата програма, организиран пречек на плоштадите и настап на многу музички ѕвезди. Годинава понудата е збогатена и со Кавала, Игало, Сараево, Златибор… За некои од нив веќе се прават и првите резервации, како на пример за Белград, каде што може да славите за само 165 евра, додека цените на пример за два полни пансиони, две свечени вечери и 1 полупансион со автобуски превоз за Копаоник изнесуваат 240 евра, но доколку се пријавите до 10 ноември сумата се намалува за 10 евра. Во поевтините варијанти за новогодишно патување влегуваат Истанбул (199 евра), Будимпешта и Виена за 199 и 189 евра, како и Краков (209 евра) или Дрезден (239 евра). Нешто поскапи се Милано (249) и Фиренца со 269 евра. Сите овие патувања се врз база на ноќевање со појадок, исполнета агенда со прошетки и задолжителен дочек на Новата година на тамошните плоштади, кои се традиционално украсени.

Иако сме на почетокот на октомври, некои од агенциите се пофалија дека веќе немаат места за новогодишните аранжмани за Париз, Рим, Тиват, Едипсос, Атина, а тие тури чинеле од 135 до 565 евра. Оние што ќе слават во Тиват, ќе ја дочекаат 2025-та во Дубровник, а ќе ги забавува Харис Џиновиќ. Има и понуди за Египет што се над 1.000 евра по лице, а спојувате задоцнето летување со дочек на Новата година. Има и понуди за бугарскиот ски-центар Банско со цени над 1.300 евра за пакет аранжмани со сместување „ол инклузив“ и забава со познати бугарски естрадни ѕвезди.

Можноста Новата година да ја дочекате во Палермо, Италија, ќе ве чини 808 евра, и тоа за четири ноќевања со појадок. Во цената е вклучена и целодневна екскурзија до Етна и Магнетна Таормина, а останатите екскурзии се наплатуваат дополнително. Се лета од Софија до Катанија.

За 1.550 евра може да си направите и тура низ Андалузија, која почнува на 29 декември 2024 година, а завршува на 5 јануари 2025 година. Ексклузивна е и понудата за Париз-Дизниленд со организиран заеднички дочек на Новата година на еден од плоштадите во Париз или Елисејските полиња. Можноста најлудата ноќ да ја дочекате во земјата каде се снима популарниот „Сарвајвер“ – Доминикана трае девет дена и стартува на 28 декември, а ќе ве чини од 2.580 до 2990 евра, во зависност од избраниот хотел.

Во цената не се вклучени авионските билети Софија – Мадрид – Софија: од 200 евра со вклучен багаж, ноќевање во Мадрид по потреба – 60 евра по лице и дополнителните екскурзии, но затоа може да уживате во нуркање на прекрасните доминикански плажи. Промотивна е и понудата за Нова година во Катар за која се лета од Софија и чини 1.658 евра, како и за Шри Ланка за што ќе треба да платите 2.390 евра. Промотивна е и понудата за Малдиви, а за ова задоволство ќе треба да издвоите над 4.000 евра.