Деветнаесетгодишно момче вчера било пронајдено починато на влезот во Струмица. Трагичната вест за МИА ја потврдија од ОЈО Струмица и СВР Струмица.

Како што наведуваат, М.А. бил пронајден на локација позади складот за дрва на Шумското стопанство „Беласица“, на местото „Крива Река“. Се работи за матурант од едно од струмичките средни училишта.

„Телото на момчето е предадено на обдукција и од досегашните наоди нема знаци на насилство и се чекаат токсиколошките анализи за да се добие појасна слика за причините за смртта“.

И од полицијата потврдуваат дека вчера околу 12 часот било пријавено дека во близина на Струмица, на необработена нива, било пронајдено безживотно тело на 19-годишно момче од Струмица.

Лекар констатирал смрт, а увид на местото извршиле јавен обвинител од Основното јавно обвинителство Струмица и екипа на СВР Струмица. По наредба на јавен обвинител телото било предадено на обдукција, се наведува во информацијата од СВР Струмица.