Легендарната британска пејачка и актерка Маријан Фејтфул почина на 78-годишна возраст, соопшти нејзиниот портпарол, а пренесе Би-би-си.

„Со длабока тага ја соопштуваме смртта на пејачката, текстописец и актерка Маријан Фејтфул. Таа почина мирно во Лондон, опкружена со своето сакано семејство. Ќе ни недостасува бескрајно“, стои во соопштението до јавноста.

Родена во Хемпстед во декември 1946 година, Фејтфул стекна слава со хитот „As Tears Go By“, кој во 1964 година се искачи на британските топ-листи. Покрај музичката кариера, таа се истакна и на филмското платно, со улоги во филмови како „Девојката на мотор“ („The Girl On A Motorcycle“) (1968).

Во шеесеттите години на минатиот век беше во врска со фронтменот на „Ролинг стоунс“, Мик Џегер, инспирирајќи некои од најпознатите песни на бендот, како „Wild Horses и „You Can’t Always Get What You Want“. По период на зависност од хероин во седумдесеттите, го направи својот триумфален камбек со албумот „Broken English“ (1979), кој го означи новиот, подлабок и подраматичен израз во нејзиниот музички стил.

Фејтфул низ годините се соочи со сериозни здравствени предизвици, вклучувајќи булимија, рак на дојка и емфизем, последица на децениско пушење. Во 2020 година преживеа тешка битка со ковид-19, и покрај тоа што лекарите не ѝ даваа големи шанси за опоравување. Сепак, само една година подоцна, ја покажа својата непокорност со издавањето на 21. студиски албум „She Walks in Beauty“.

Нејзината кариера е автентичен портрет на ерата на рокенролот. Со албумите „Marianne Faithfull“ и „North Country Maid“, беше дел од „британската инвазија“ на американските топ-листи.

Нејзината бурна љубов со Џегер ја направи мета на таблоидите, а по нивното разделување, падна во зависност од дрога, на моменти живеејќи дури и на улиците на Сохо.

Нејзиниот камбек започна со „Dreamin’ My Dreams“ (1976), но вистинската трансформација ја доживеа со „Broken English“, каде што го покажа својот нов, продлабочен вокал, исполнет со искуство и емоција. Албумот беше номиниран за Греми и ја зацврсти нејзината позиција во музичката историја.

Во подоцнежните години соработуваше со артисти како Пи Џеј Харви и Ник Кејв, кои ја сметаа за инспирација.

Во 2009 година ја доби престижната награда „Светска награда за животно дело“, а француската влада ја одликува со Орден на уметноста и книжевноста, признание за нејзиниот извонреден придонес во уметноста.