Почина младиот Кристијан Коцев – Кико, за чие лекување граѓаните собраа над 50 илјади евра преку СМС донации. Тој имаше ретка дијагноза „атаксија“ и требаше да замине да се лекува во Турција. Голема поддршка му пружија граѓаните во последните денови од неговиот живот, но тој не дочека да го продолжи лекувањето во Турција.

„Те засакав како помал брат, ова е најтешкиот ден во мојот живот. Се дадовме за тебе, се бореше до крај како вистински победник, но за жал не успеа. Многу те сакам, многу ќе ми фалиш братче мое. Еден ден ќе се сретнеме и ќе си кажеме за многу работи кои останаа недокажани. Ти ме научи што значи да сакаш да живееш… Почивај во мир Кико, напиша на Фејсбук јутуберот Стефан Лазаров кој помогна да се дознае неговата приказна.

Министерот за здравство Фатмир Меџити изјави дека Кристијан Коцев воопшто не се лекувал во јавно здравство досега.

-Тој нема поднесено барање до надлежните институции. Досега не се лекувал во јавно здравје. Четири-пет години не бил на преглед, така што ние не знаеме што се случува. Ова се државни институции здравствени и треба да има службено барање за да се разгледува, рече министерот.

Министерот Меџити рече дека секогаш се тука за пациентите и кога би имало такво барање, тие би го разгледале и би постапиле согласно законите за заштита.

Дваесетгодишното момче Кико требаше да биде лекувано со матични клетки во Истанбул. Тој боледуваше од ретка и тешка болест која брзо прогресира и за кратко време доведува до сериозна состојба.

Преку апели и објави на социјалните мрежи, парите беа собрани за четири дена, по што семејството започна постапка за стопирање на телефонските броеви за донации и јавно се заблагодари:

– Бескрајно сме ви благодарни на сите што бевте со нас. На сите што дадовте сè од себе за Кико. Кико На сите ви испраќа бакнежи и ве сака. Молете се за него да биде добро и да е среќен. Борбата продолжува, ќе се избориме сите заедно – стои во објавта од семејството на Кико.